Plantun de Prouvènço

Pèr coumpara dos planto d'encò nostre

Allium rotundum & Plumbago europaea

Aiet(-redoun)

Allium rotundum

Amaryllidaceae Alliaceae

Àutri noum : Aiastre, Cebihoun.

Nom en français : Ail à inflorescences rondes.

Descripcioun :
L'aiet-redoun trachis dins li plano d'eici d'eila, dins lis armas, sus li pendis e en ribo de camin. Se recounèis à si fielat d'estamino di tres coustat e à si fueio pleno e plato au contro de l'aiet-fèr qu'a éu li fueio boutisso. Apoudèn que i'a ges de bousseleto dins l'enflourejado au contro de la racambolo. Èi bessai un arqueofite vengu emé li grano de blad.

Usanço :
Aquest aiet èi gaire acampa en Prouvènço, pamens li tèsto coume li fueio soun manjadisso cruso o cuecho.

Port : Erbo
Taio : 40 à 100 cm
Fueio : costo paralèlo
Tipe bioulougico : Geoufite
Cicle bioulougico : Planto renadivo

Gènre : Allium
Famiho : Amaryllidaceae
Famiho classico : Alliaceae

Ordre : Aspargales

Coulour de la flour : Vióuleto
Petalo : 6
Ø (o loungour) enflourejado : 2 à 4 cm
Flourido : Printèms

Sòu : Ca
Autour basso e auto : 0 à 1200 m
Aparado : Noun
Abriéu à jun

Liò : Ermas - Camin - Pendis
Estànci : Mesoumediterran à Subremediterran
Couroulougi : Éurasiatico
Ref. sc. : Allium rotundum L., 1762

Erbo-di-rascas

Plumbago europaea

Plumbaginaceae

Àutri noum : Erbo-enrabiado, Bagoun, Erbo-de-la-rougno, Erbo-di-couquin, Malo-erbo.

Noms en français : Dentelaire, Malherbe.

Descripcioun :
L'erbo-di-racas, mens coumuno qu'à passa tèms, trachis en ribo de camin, i pèd de muraio e dins lis escoumbre ounte flouris amé de poulìdi flour vióuleto, à la fin de l'estiéu. Es uno planto eisado de recounèisse emé si flour e si fru pegous qu'arrapon li péu e li teissu.

Usanço :
Èi couneigudo au nostre pèr garris la rasco. Ramentèn qu'aquesto malautié de pèu e de péu s'aprèn à de champignoun coume Microsporum canis. Freta la bèsti emé d'òli de bagoun (adouba en fasèn bouli la planto dins l'òli). Se dis peréu qu'en mastegant la racino, apaisso li ràbi de dènt (erbo-enrabiado)-TdF. Pamens se n'en fau mesfissa que fretado sus la pèu pòu douna d'enflamacioun.